La Fundación Princesa d’Asturies convoca’l Premiu al Pueblu Exemplar d’Asturies..
Van poder presentar propuesta razonada de candidatos les instituciones, centros culturales, asociaciones de vecinos, entidaes, empreses, amás de los ciudadanos que quieran.
Los miembros del xuráu nun van poder presentar candidatures.
Les candidatures presentaes han proponer pal premiu un solu pueblu, aldea, nucleu de población o espaciu paisaxísticu. Tamién van poder optar al gallardón grupos humanos.
Les candidatures van poder unviase, desque se complete’l formulariu oficial, disponible na páxina web de la Fundación (www.fpa.es):
- Al corréu electrónicu fpa@fpa.es, añadiendo nel asuntu: Candidatura Premiu Pueblu Exemplar.
- Per corréu (c/ Plácido Arango Arias, 2 - 33004, Uviéu-Asturies).
- Puen presentase nel domiciliu social de la Fundación (c/ Plácido Arango Arias, 2, Uviéu).
El plazu de presentación de candidatures, apoyos y adhesiones va quedar zarráu’l día 9 de xunetu del 2026 a les 14:00 hores.
Nun plazu de 10 díes hábiles desque se reciba la candidatura, la Fundación va unviar acuse de recibu de la documentación presentao al corréu electrónicu indicáu pol proponente nel formulariu oficial.
La documentación qu’ha incluyise na presentación de cada candidatura, acompañando al impresu oficial, ye:
- Propuesta formal, esplicando les razones poles que se presenta la candidatura.
- Documentación sobre’l pueblu, llugar, nucleu de población, espaciu paisaxísticu o grupu humanu propuestu.
Pueden acompañase tamién, si ye menester, apoyos y adhesiones a la candidatura y, en xeneral, tolos datos y información qu’abulten afayadizos pa fortalecer la propuesta.
Les candidatures que nun cumplan los requisitos anteriores nun van almitise.
La Fundación Princesa d’Asturies nun tien correspondencia sobre la documentación recibío nin lo vuelve.
CÓDIGU DE CONDUCTA
Los xuraos tán suxetos al Códigu de conducta de la Fundación Princesa d’Asturies, qu’espresa’l compromisu de la institución con un comportamientu éticu en tolo rellacionao cola so actividá.
DESIGNACIÓN Y CONSTITUCIÓN
- El xuráu nómalu anualmente la Fundación Princesa d’Asturies d’alcuerdu colos criterios aprobaos pol so Patronatu.
- Cada xuráu va tener un presidente y un secretariu. Dambos, con voz y votu, nómalos enantes la Fundación Princesa d’Asturies.
- El presidente organiza y dirixe les deliberaciones y les votaciones. El secretariu mira pol cumplimientu del reglamentu.
- Los integrantes del xuráu han tar presentes dende’l momentu mesmu de la so constitución hasta la votación final.
- Los xuraos han obrar en tou momentu con independencia, ecuanimidá y rigor.
- Les deliberaciones de los xuraos son secretes.
- El votu ye indelegable y ha espresase siempre en sentíu positivu, promoviendo hasta la fin la elección socesiva de la candidatura preferida pola mayoría
- Les candidatures presentaes nun se van poder camudar en nengún sentíu.
- El premiu va otorgase namás a una candidatura y por mayoría. El presidente va tener votu de calidá en casu d’empate.
El Premiu al Pueblu Exemplar d’Asturies consta d’un diploma acreitativu, una placa conmemorativa y una dotación de cuarenta mil euros (40.000 €).
La visita al llugar gallardonáu pa la celebración del actu d'entrega institucional y de tolos actos que se celebren nesa fecha va organizala namás la Fundación Princesa d'Asturies.