La Fundación Princesa d’Asturies convoca’l Premiu al Pueblu Exemplar d’Asturies.
La Fundación Princesa d’Asturies ye una institución privada ensin afán d’arriquecimientu que tien como oxetivos ayudar a la exaltación y promoción de cuantos valores científicos, culturales y humanísticos son patrimoniu universal y afianzar los vínculos existentes ente’l Principáu d’Asturies y el títulu que tradicionalmente ostenten los heriedes de la Corona d’España.
S. M. el Rei Don Felipe VI foi Presidente d’Honor de la Fundación de magar se constituyó en 1980. Desque lu proclamaron Rei d’España’l 19 de xunu del 2014, S.A.R. Doña Leonor de Borbón y Ortiz, Princesa d’Asturies, ostenta la Presidencia d’Honor d’esta institución, que convoca anualmente los Premios Princesa d’Asturies.
Destinaos a gallardonar el llabor científicu, técnicu, cultural, social y humanitariu fechu por persones, instituciones, grupos de persones o d’instituciones nel ámbitu internacional, concédense n’ocho categoríes: Artes, Ciencies Sociales, Comunicación y Humanidaes, Concordia, Cooperación Internacional, Deportes, Investigación Científica y Técnica y Lletres.
Al cumplise en 1990 el décimu aniversariu de la Fundación, y en conmemoración d’esta efeméride, creóse un gallardón nuevu, col nome Premiu al Pueblu Exemplar d’Asturies, d’otra naturaleza y calter que los Premios Princesa d’Asturies.
La Fundación Princesa d’Asturies (d’equí p’alantre, la Fundación) fai pública la convocatoria del Premiu al Pueblu Exemplar d’Asturies 2027, la cual va mandase por esti Reglamentu, aprobáu pol so Patronatu.
El Premiu al Pueblu Exemplar d’Asturies concédese al pueblu, aldea, nucleu de población, espaciu paisaxísticu o grupu humanu del Principáu d’Asturies que destacare de manera notable na defensa y caltenimientu de la so contornada natural, ambiental, del so patrimoniu históricu, cultural o artísticu, n’iniciatives d’impulsu económicu y social o na realización d’obres a comuña o otres manifestaciones de solidaridá estraordinaria.
El Premiu al Pueblu Exemplar d’Asturias ta dotáu con:
- un diploma acreitativu;
- una placa conmemorativa;
- 40.000 €.
Presentación
Van poder presentar propuesta razonada de candidatos les instituciones, centros culturales, asociaciones de vecinos, entidaes, empreses, amás de los ciudadanos que quieran.
Los miembros del xuráu nun van poder presentar candidatures.
Les candidatures presentaes han proponer pal premiu un solu pueblu, aldea, nucleu de población o espaciu paisaxísticu. Tamién van poder optar al gallardón grupos humanos.
Forma y plazos de presentación
La presentación de la candidatura precisa de la cumplimentación y firma del formulariu oficial, que va tar disponible na páxina web de la Fundación (www.fpa.es).
El formulariu oficial va poder acompañase de tolos documentos, bibliografía y materiales audiovisuales que se quiera, cola mira d’acreitar los méritos de la candidatura propuesta.
Va poder presentase al traviés d’estes víes:
- corréu electrónicu fpa@fpa.es, añadiendo nel asuntu: Candidatura Premiu Pueblu Exemplar.
- corréu postal o nel domiciliu social de la Fundación (c/ Plácido Arango Arias, 2 - 33004, Uviéu-Principáu d’Asturies).
Van poder, amás, mandase los apoyos que se consideren oportunos al corréu electrónicu apoyos@fpa.es indicando nel asuntu la candidatura que s’apoya.
El plazu de presentación de candidatures y apoyos remata’l día 8 de xunetu del 2027 a les 14:00 hores.
Nun plazu de 10 díes hábiles desque se reciba la candidatura, la Fundación va unviar acuse de recibu de la documentación presentao al corréu electrónicu indicáu pol proponente nel formulariu oficial.
La documentación qu’ha incluyise na presentación de cada candidatura, acompañando al impresu oficial, ye:
- Propuesta formal, esplicando les razones poles que se presenta la candidatura.
- Documentación sobre’l pueblu, aldea, nucleu de población, espaciu paisaxísticu o grupu humanu propuestu..
Les candidatures que nun cumplan los requisitos anteriores nun van almitise.
La Fundación nun tien correspondencia sobre la documentación recibío nin lo vuelve.
Códigu de conducta
Los xuraos tán suxetos al Códigu de conducta de la Fundación, qu’espresa’l compromisu de la institución con un comportamientu éticu en tolo rellacionao cola so actividá.
Nomamientu y constitución
El xuráu nómalu anualmente la Fundación d’alcuerdu colos criterios aprobaos pol so Patronatu.
El xuráu va tener un presidente y un secretariu. Dambos, con voz y votu, nómalos enantes la Fundación.
El presidente organiza y dirixe les deliberaciones y les votaciones. El secretariu mira pol cumplimientu del reglamentu.
Deliberaciones
Los integrantes del xuráu han tar presentes dende’l momentu mesmu de la so constitución hasta la votación final.
Les deliberaciones de los xuraos son secretes.
Los xuraos han obrar en tou momentu con independencia, ecuanimidá y rigor.
El votu ye indelegable.
Les candidatures presentaes nun se van poder camudar en nengún sentíu.
El votu ha espresase siempre en sentíu positivu, promoviendo hasta la fin la elección socesiva de les candidatures preferíes pola mayoría
El premiu va otorgase namás a una candidatura y por mayoría. El presidente va tener votu de calidá en casu d’empate.
La visita al llugar gallardonáu pa la celebración del actu d'entrega institucional y los actos que se celebren nesa fecha va organizalos namás la Fundación.